O‘zbekiston Axborot-kommunikatsiya texnologiyalari haftaligi — ICTWEEK UZBEKISTAN — O‘zbekistonda 2004-yildan buyon har yili o‘tkazib kelinayotgan axborot texnologiyalari sohasidagi yirik va muhim tadbirlardan biridir. ICTWEEK UZBEKISTAN an’anaviy ravishda bir qator ixtisoslashtirilgan tadbirlarni yagona formatga birlashtirib, zamonaviy texnologiyalar va innovatsiyalar sohasidagi tajriba almashish hamda yutuqlarni namoyish etish uchun platforma yaratadi. Shuningdek, bu O‘zbekiston IT-bozorining jozibadorligini xorijiy investorlar uchun namoyish etish, davlat, kompaniyalar va iste’molchilar o‘rtasidagi hamkorlikni rivojlantirish uchun qulay maydondir.

ICTWEEK’ning uzoq yillik hamkori bo‘lgan va O‘zbekistonda 26 yildan ortiq faoliyat yuritayotgan Huawei kompaniyasi bu yil “Golden Partner” maqomida “haftalik”ning asosiy tadbirlarida, jumladan, AKT texnologiyalari ko‘rgazmasida ishtirok etadi.

Bu yil Huawei ko‘rgazmasiningasosiy mavzusi “Advancing All Intelligence” hamda intellektual raqamli infratuzilmani rivojlantirishga bag‘ishlanadi. Kompaniya stendida operatorlik va korporativ segmentlar, davlat tashkilotlari hamda iqtisodiyotning turli tarmoqlari uchun ilg‘or yechimlar namoyish etiladi. Yuqori tezlikdagi ma’lumot uzatish tarmoqlari, bulutli texnologiyalar, ma’lumotlarni saqlash tizimlari va sun’iy intellektning amaliy qo‘llanilishiga alohida e’tibor qaratiladi.

ICTWEEK Uzbekistan 2026 doirasidagi asosiy tadbirlardan biri sun’iy intellekt va raqamli iqtisodiyotni (AI & Digital Economy) rivojlantirish masalalariga bag‘ishlangan Future Intelligence Forum bo‘ladi. Forum davlat sektori, texnologiyalar sohasi, biznes va ekspert hamjamiyati vakillarini birlashtirib, sun’iy intellekt va zamonaviy raqamli texnologiyalarning O‘zbekiston iqtisodiyotini rivojlantirishdagi o‘rnini muhokama qilish uchun platforma yaratadi. Tadbir 2026-yil 23-sentabr kuni O‘zbekiston Respublikasi Raqamli texnologiyalar vazirligi, Raqamli iqtisodiyotni tadqiq etish markazi va IT-ta’lim assotsiatsiyasi ko‘magida bo‘lib o‘tadi. Forumda ro‘yxatdan o‘tish va tadbir haqida batafsil ma’lumot olish uchun veb-saytga tashrif buyurishingiz mumkin.

Biz AKT sohasi mutaxassislarini, davlat sektori vakillarini, IT yo‘nalishlarida tahsil olayotgan talabalarni hamda raqamli texnologiyalarga qiziqadigan barcha insonlarni Huawei kompaniyasining ko‘rgazma stendiga tashrif buyurishga va “Future Intelligence Forum”da ishtirok etishga taklif qilamiz. Sizni innovatsion yechimlar, muvaffaqiyatli loyihalarning amaliy misollari va soha ekspertlari bilan jonli muloqot kutmoqda. Raqamli O‘zbekiston rivojiga xizmat qiladigan muhim voqealarning bir qismiga aylaning!